Überspringen zu Hauptinhalt

Camonds ed obedientscha

Fai per camond! Quei vegn magari detg ad affons. Da dir: Fai obedientscha, fuss meglier. Obedientscha vegn dil latin “obedire” e quei vul dir: ir encunter, pia vegnir encunter ad in basegns ni giavisch. Quei ei gia ina motivaziun.

Ella Bibla dat ei ils schinumnai 10 condaments. Era ils Israelits vegnan a ver dumandau suenter il senn da quels condaments. Pertgei duein nus agir aschia, tgei ei il senn da tals camonds?

Dieus sez dat la motivaziun. El di: Jeu sun il Segner tiu Diu che ha menau tei ord la tiara d’Egipta, ord la casa da sclaveria. Ils condaments anflan la motivaziun ed il fundament sin basa dall’experientscha dil pievel d’Israel cun Diu che la liberau els. Sch’el ei quel che liberescha, sche ston els buca temer ch’el metti els puspei en cadeinas entras ils schinumnai condaments.

 

Ti dueis - Ti vegns bein

Biars han inaga empriu ils diesch condaments cun la formulaziun: Ti dueis… Ella Bibla entupein nus denton la noziun: Decalog, ils diesch plaids ch’ein plaids beinvulents. Enstagl da dir: Ti dueis… san ins era trans­latar quei cun: ti vegns bein… Lu tuna ei aschia: Ti carstgaun che has udiu tgi ch’ei da tia vart, vegns bein buc a far ni tralaschar quei, pertgei ei porta a ti gie nuot auter che quei che ti has giu: miseria e sclaveria!

Ils diesch condaments ein plaids da veta. Els portan libertad, pertgei nus curdassen veramein en sclaveria senza els, damai ch’il ferm e grond ed egoist vess surmaun. Els ein plaids empalonts che Dieus di a nus en carezia. Quels diesch plaids ein era daventai in fundament per ina civilisaziun humana.

Sur Marcus Flury

An den Anfang scrollen