Überspringen zu Hauptinhalt

Job e sia „Hiobsbotschaft“

Segir enconuscheis Vus la noziun “Hiobsbotschaft”, in’expressiun d’ina novitad sgarscheivla. Il cudisch Job el Veder Testament raquenta, con anetg e senza schanetg in discletg sa vegnir sur dad in carstgaun. Job, cun il qual ei mava gie all’entschatta fetg bein, piarda tuttenina siu entir possess. Ses fegls e sias feglias sedisgrazieschan mortalmein. El sez vegn malsauns. Sia pial ei cuvretga da biergnas, sia dunna sedistanziescha dad el. Ses amitgs vegnan e din mo flosclas si per Job, el seigi gie la finala sez la cuolpa vid siu discletg. Cheu ei dad anflar negin confiert ni senn ella veta da Job, igl ei ina vegetar senza senn e cuntegn. In tal carstgaun ei Job en tut sia miseria.

E Job ha en tuts temps ed en tuttas tiaras ses cumpogns. Dapertut ed adina puspei dat ei carstgauns, che crodan senz’atgna cuolpa en miseria, che piardan lur dacasa, lur lavur, lur paun da mintgadi, che vegnan malsauns, che ston murir.

Job haveva nuot pli. El haveva mo pli siu Diu. Mo quel era, sco ei para, sparius. E co va Job ussa entuorn cun siu Diu? Tgei patratgs ha el sur da sia cardientscha? Duei el sedeliberar, fierer naven quella sco in scret da lotto che ha purtau negin cletg?

Na, all’entschatta ha Job aunc la forza, da dir plein fidonza: “Il Segner ha dau, ils Segner ha priu. Ludaus seigi il num dil Segner.” Job 1,21

Pli tard svanescha era tier el la speronza.  En sia miseria sedrezza Job enviers Diu. Job ha da renfetschar a sesez nuot, el ei adina staus reclis e gests, ha viviu ina buna veta enviers Diu ed ils carstgauns. Daco castigia lu Dieus el sin tal’uisa? Ina damonda tipica, la quala forsa era enqual da nus ha gia setschentau. “Pertgei gest jeu?”

Job ha survegniu sin pliras modas sia risposta. Quella consista ord capientscha, fideivladad e humilitonza. El vegn cunscients: Dieus ei pli gronds ch’il carstgaun. Dieus vegn franc buc a far sbagls. El vegn a far il dretg el dretg temps.

Job ha aunc astgau veser il Happy End: nova forza, niev beinstar. Job 42,10

Mo quei cletg han buca tuts, deplorablamein. Per tut quels che han buca la quida dad veser in Happy End resta ina plaga aviarta. Mo forsa resta era la speronza, la fidonza, cun la quala per exempel in Jesus ha saviu urar alla fin pendend vid la crusch: “Bab, en tes mauns recamondel jeu miu spért.”

Cordialmein, Armin Cavelti

 

 

An den Anfang scrollen