Überspringen zu Hauptinhalt

La religiun dil ballapei

Interessant ei, per tgei discussiuns igl entir brimbori entuorn il ballapei resp. entuorn ils ballapedists procura. Tgi ha tgei frisura, astga il stadion sepresentar en las colurs digl artg ni pertgei contan buca tut ils giugadurs Svizzers la himna? Gest pertuccont la davosa damonda dat ei differentas teorias. Tgi manegia ch’els sappien buca cantar, tgi ei dil meini ch’ei seigi meglier da serimnar e seconcentrar en quei mument, ed auters supponan ch’ils giugadurs buca cristians savessien haver breigia cun il confess dil text. En mintga cass dat il campiunadi da discuorer.

Malgrad che jeu sun buc in fanun da ballapei, va quei event buca sper mei vi. Ed jeu stoi conceder, che la fascinaziun radiescha era entochen tier mei. Da temps en temps sun jeu quasi intec schalusa sin «la religiun ballapei». Ina certa concurrenza eis ella gie schon tier nossa religiun cristiana. Co sa ei esser che tons pelegrineschan els tempels da sport per celebrar leu da cuminonza lur sogns? Tgei fa il ballapei endretg che giugadurs e fans da differentas religiuns e confessiuns s’entaupan? La risposta hai jeu aunc buc anflau, denton jeu sun alla tscherca.

Assistenta pastorala Flurina Cavegn-Tomaschett

An den Anfang scrollen