Überspringen zu Hauptinhalt

Nus essan ureglia

Miez october ei il process sinodal en nossa diocesa vegnius lantschaus. Naven da quei di san ins arver via pagina-web www.wir-sind-ohr.ch in catalog da damondas pertuccont igl esser Baselgia ed il plidar davart la Baselgia dil futur. Il catalog stat a disposiziun a mintgin:a. Suletta cundiziun ei, ch’il discuorer davart las damondas ed igl anflar rispostas succedi en ina gruppa da minimum 5 persunas.

Sinodal deriva dil grec e manegia esser communablamein sin via. Tgi ch’ei communablamein sin via va ella medema direcziun, ha pil pli ina finamira, pren risguard in sin l’auter e teidla in sin l’auter. Gest quei ei tenor miu manegiar la finamira dil process sinodal. Igl ei ina damonda dil stil, dalla tenuta digl esser Baselgia.

Il process sinodal ei buca mo in project da nies uestgiu. El ei era proclamaus da Papa Francestg e duei valer sco basa da preparaziun per la sinoda mundiala che vegn ad haver liug igl onn 2023. Tedlar in sin l’auter ei la basa per scadin dialog e l’entschatta per ina midada. Lein denton sperar ch’il process sinodal porti era fretg. Pertgei: visiuns, senza acziuns ein illusiuns.

Cordial invit da separticipar: www.wir-sind-ohr.ch/synodaler-prozess

Flurina Cavegn-Tomaschett
Assistenta pastorala

An den Anfang scrollen