Überspringen zu Hauptinhalt

Nutriment per tgierp ed olma

Veis vus era gia sedumandau, tgei spisa che Jesus prefereva? Mo paun e vin? Quei crei jeu buc! Segir ha era Jesus schau gustar las pli differentas tratgas. Sin ina damonda suenter la spisa (preferinda) da Jesus ha el dau suandonta risposta: Mia spisa eis ei da far la voluntad da quel che ha tarmess mei e da cumplenir sia ovra. Gn 4,34

Quei eis ei, da quei viva Jesus, quei empleina sia veta. Da realisar la volutad da Diu, siu Bab cun plaids e cun ovras. E Jesus vul ch’era nus fageien part a quella tschavera spiritala. El vul ch’era nus anfleien quei gust. Sper tuttas spisas gustusas dat ei aunc zatgei auter, el qual nus savein e duessen morder viaden. Tgi che integrescha la veglia da Diu, quel vegn a reviver. Tgi che ha fom e seit per la gestadad, en quel sgarguglia ina fontauna d’aua viva.

Ins di: Ins maglia era culs egls. Sche la spisa vegn presentada bien, lu selegr’ins aunc pli fetg sin saver magliar ella. La spisa, tier la quala Jesus envida nus, quella spisa vegn presentada a nus cun bia carezia. Ella cuntegn ina massa cardientscha e fidonza. Ella dat la forza per far il bien. Ei va cheu buca mo per il paun sogn, l’eucaristia, il Tgierp da Cristus. L’entira cuminonza, la quala Jesus regala a nus, sia Nuviala, sia amicezia e sia preschientscha denter nus tochen alla fin dils temps, tut quei ei il paun, dil qual nus vivin ed ord il qual nus saven retrer nossa forza.

Armin Cavelti, gidonter pastoral

An den Anfang scrollen