Pfarreiratssitzung
Sentupada dil cussegl pastoral

Dapli biars onns s’engascha l’anteriura calustra dalla baselgia catolica da Glion el cussegl pastoral. Cun metter a disposiziun siu post ha Marta Riedi instradau ina discussiun digl avegnir.

Augustin Beeli/FMR

Pliras damondas ein stadas el center dalla sesida. La presidenta haveva annunziau sigl invit: «Cussegl pastoral, co vinavon? Tgei e nua vulein nus ir?» Per ordinari tracta quei gremi occurrenzas digl onn ecclesiastic e l’organisaziun da quellas. Duas gadas ad onn s’entaupa el cul team pastoral dalla pleiv da Glion. Il parsura ei sur Alfred Cavelti. El e la teologa Flurina Cavegn meinan ina squadra motivada ellas quater pleivs Glion, Schluein, Sagogn e Sevgein. Tenor la mira dall’annunziaziun sesprova quei team da motivar e dar impuls alla veta dallas cuminonzas.

Ina dallas finamiras operativas eis ei da coordinar las activitads cun termins ed manifestaziuns. Sch’ina dallas quater pleivs festivescha per exempel perdanonza, duei quella esser el center, ils parochians da tschellas ein envidai da separticipar. La fiasta dall’emprema s. Communiun duei esser da cuminonza en in liug ed era la s. Creisma. Il diember d’affons e la mobilitad lubeschan da far quei. Sper las casualias dat ei vinavon en mintga liug singulas occurrenzas localas.

Da Glion anora organisescha il team pastoral ils survetschs divins, devoziuns e seras d’impuls, acziuns e tradiziuns religiusas duront igl onn. Il fegl parochial ei daventaus in instrument efficient e nizzeivel per communicar mintga meins quei che schabegia ellas quater pleivs. A Glion ha il cussegl pastoral ina pli liunga tradiziun, era ils representants dallas treis pleivs affiliadas fan oz part da quei gremi. Dacuort ha la parsura dalla gruppa, Marta Riedi, envidau ad ina sera senza plans da termins, gliestas da pensums e detagls organisatoris.

Auter access tier famiglias giuvnas«Las casualias ein enorm impurtontas. Leu survegn la glieud il meglier in maletg dalla Baselgia», ha sur Alfred Cavelti declarau. Ils basegns ein semidai, a caschun da nozzas e sepultura serimna tonaton bia tochen fetg bia glieud en baselgia. Igl ei il mument ch’ins sa svegliar lur interess. Sco center regiunal ha Glion gronda accoglientscha d’indigens, hosps e famiglias da luvrers jasters. Il cussegl pastoral ha discutau co ins duei rinforzar ils ligioms cul pievel en general. Quel selai buca pli contonscher schi tgunsch sco antruras. Ils interess spirituals ein semidai e las activitads ecclesiasticas en concurrenza cun sport, temps liber e divertiments multifars. «Nua ha la Baselgia aunc plaz e co sa ella ‹sevender› pli efficient?» ei ina damonda ch’il cussegl pastoral vul discutar. Las casualias, pia battens, sepulturas e nozzas, ein aunc adina impurtontas en quei risguard.

La generaziun pli veglia, vul gir da 50 onns ensi, sesenta colligiada emoziunalmein aunc adina cun rituals, spiritualitad e fiastas religiusas. Per animar e motivar famiglias giuvnas drova ei denton in’auter access. Per exempel sur la preparaziun silla emprema s. Communiun. Cheu vegnan ils geniturs involvai. Activs ein quels denton mo a cuorta vesta. Cu la fiasta ei a fin, suonda la passivitad. Il cussegl pastoral vul cuntinuar la discussiun co e cun tgei mesiras ch’ins savess intimar la populaziun da separticipar allas activitads dallas quater pleivs. Buc il davos sto il gremi reglar la successiun dalla presidenta Marta Riedi che vul vegnir descargada da siu post. «Ei marscha schi bia actualmein, mo nus stuein mirar el futur baul avunda», ha ella declarau alla sentupada.