Von Freitag, 1. September, bis Sonntag, 3. September, fand unsere Pfarreireise nach St. Maurice statt. Hier der Bericht der Quotidiana

In amen tier sogn Murezi el Valleis

 

La davosa fin d’jamna ei ina gruppa dallas pleivs da Glion, Sevgein, Schluein e Sagogn stada sin viadi. Finamira eis ei stau da visitar Saint Maurice. Ella pli veglia abbazia dall’Europa dil vest vivan e lavuran paders e canonis dapi 1500 onns.

Augustin Beeli/FMR

«Sesaulza il sulegl, jeu ditgel bein marvegl…», ha ei tunau vendergis endamaun el bus. Ina gruppa da 37 persunas ha entschiet cun quella canzun il viadi da treis gis dallas pleivs Glion, Sevgein, ScLa gruppa da viadi avon l’entrada dalla basilica a Saint Maurice.hluein e Sagogn. Il mument ch’il sulegl ei levaus ha il manischunz Mario Gartmann priu la direcziun Cuera-Turitg ed autostrada A1. Solothurn ei stau l’emprema etappa dil viadi. La presidenta dalla gruppa pastorala da Glion, Marta Riedi , ensemen cun Yvonne Caprez , havevan organisau ina guidada dil marcauet ed ina viseta ella catedrala St. Ursen. Igl ei il pli impurtont monument dil classicissem tumpriv svizzer. Ella ustria historica «Roter Turm» ha la gruppa gentau e gudiu la cumpignia. «Cheu stuein nus returnar. Nus havein gnanc saviu con bi che Solothurn ei», han ins udiu d’enqualin.

 

 

 

Marcauet da 4000 habitonts

Las biaras ed ils biars han giu marveglias co il viadi cuntinueschi. Quel ha giu connex culs patruns da Solothurn Ursus e Victor. Els ein stai camerats da Murezi, gl’officier dalla legiun tebeica. Duas uras pli tard ei il bus arrivaus ella vallada dil Rodan a Saint Maurice, la finamira dil viadi. Che sogn Murezi ei il patrun dalla Lumnezia ei enconuschent. Ins sa era ch’igl ei la metropola turistica ell’Engiadin’Aulta. Dameins san ins che quei sogn ha giu influenza decisiva per la cristianisaziun dall’Europa dil vest. Per duas notgs ha la gruppa priu domicil ella «Hôtellerie Franciscaine». Igl ei ina casa d’albiert dils caputschins. Cun 42 combras e 70 letgs eis ei in menaschi modern che s’auda tier la claustra dil 17avel tschentaner. Participontas e participonts dalla Surselva han giu caschun da prender ina emprema impressiun da Saint Maurice.

Il marcauet vallesan da 4000 habitonts ei situaus el liug pli stretg dalla val. L’attracziun principala ei l’abbazia. Quella han ins baghegiau gl’onn 515 sut ina enorma preitcrap. Dapi lu vivan e lavuran nuninterruttamein conventuals, paders e canonis en quella. La sonda suentermiezgi ha la gruppa visitau la baselgia e la zona archeologica «Martolet». Las scavaziuns han purtau alla glisch numerusas informaziuns e perdetgas dalla historia. Examinaziuns e retschercas scientificas han saviu cumprovar numerus detagls entuorn la legenda da sogn Murezi. Daferton ei la cripta cun ossa da legiunaris tebeics d’entuorn gl’onn 280 excavada ed accessibla. Sch’igl ei veramein quella digl officier Maurikos vegnan ins mai a saver eruir exact.

35 000 tonnas sal ad onn

In cuort viadi da diesch minutas cul bus, da tschella vart dil Rodan, ei era stau sil program. Leu ein las salinas da Bex. Igl ei in cumplex industrial-turistic el cantun Vad. Rodund 35 000 tonnas sal svizzer lavan ins mintg’onn ord la crappa ellas cavernas sutterranas. Rodund 80 000 persunas visetan mintg’onn quell’attracziun. Igl ei il liug da derivonza d’in product da 200 milliuns onns.

In tren pign e stretg ha transportau la gruppa dalla Surselva rodund 1600 meters viaden el cuolm nua ch’ina reit da cuvels e galerias entscheiva. Suenter duas uras ein tuts returnai saunamein alla glisch dil sulegl. Las tschaveras communablas, spassegiadas e sentupadas ellas ustrias amiez la via senza traffic han rinforzau il tegn dalla gruppa da viadi. La dumengia endamaun han sur Alfred Cavelti e l’assistenta pastorala Flurina Cavegn menau il survetsch divin ella caplutta dil hotel. El center da quel han els mess il cant dil sulegl da s. Francestg. Sco sur Alfred Cavelti ha sincerau ha el constatau in bien spért da cuminonza, il viadi a Solothurn e Saint Maurice vegni a restar als biars en buna regurdientscha.

 

Maximian e gl’officier malobedeivel

Dapi 1500 onns vivan e lavuran paders e canonis nuninterruttamein ell’abbazia da Saint-Maurice. Gl’onn 515 ha prenci Sigismund dalla Burgogna, pli tard emprem retg cristian francofon, fundau quella. Finamira era ei stau da garantir la veneraziun perpetna da sogn Murezi. Rodund 250 onns avon, entuorn gl’onn 280, haveva gl’imperatur Maximian caschunau leu in massacher.

Dioclezian haveva cumandau ad ina da sias legiuns el nord dall’Africa da s’embarcar sur la Mar mediterrana e da marschar viers las Alps. La legiun tebeica, cumandada d’in cert Maurikos, ei arrivada sur il Grond sogn Bernard tochen ella fortezia romana d’Octodurum, oz Martigny. Gl’imperi roman balluccava en tuts cantuns, dapertut smanatschavan revoltas e pievels s’opponevan encunter il domini roman.

Maximian era vidlunder da defender gl’imperi roman encunter pievels e gruppas opponentas. Maurikos – aschia il num original copt da Murezi – ei arrivaus cun 6600 schuldai. Ad Octodurum ha el survegniu il camond da ragischar cun violenza las gruppas da cristians che eran seformadas. Ella stretga dalla vallada dil Rodan ha gl’officier cristian refusau il camond dad ir encunter concristians. Gl’emprem ha Maximian smanatschau e schau scavazzar mintga dieschavel schuldau dalla legiun malobedeivla. La smanatscha ha buca fatg effect, la schuldada ha buca seschau tementar. Era ina secunda acziun da scavazzar buca. La finala ha gl’imperatur cumandau da mazzar l’entira legiun tebeica. Finadin dils 6600 ei daventaus l’unfrenda dil massacher.

Il cristianissem ha gudignau ed il liug dils marters Murezi e sia legiun ha attratg ils cartents. Ils tschentaners ch’ein suandai ei Saint-Maurice avanzada sco abbazia la pli impurtonta dalla Burgogna. Oz vivan e lavuran leu aunc quater canonis digl uorden da s. Augustin. Aunc avon il massacher dalla legiun tebeica eran dus commembers da quella, Ursus e Victor, cavalcai vinavon tochen ella fortezia romana da Salodorum, oz Solothurn. Leu han ins scavazzau era els. Ursus e Victor ein ils patruns da quei marcau. (fmr/abc)