Überspringen zu Hauptinhalt

Schei vegnir ils affons tier mei!
Buca impedi els (Mc 10,14)

En nies mund valan prestaziuns enzatgei. Sut quei squetsch stattan gia affons. En scola, el sport e forsa era entras ambiziuns da geniturs duessen els prestar enzatgei ed els san cheutras esser surdumandai. En scadin cass eis ei buca bien, sch’ins vegn valetaus mo tenor la prestaziun. Aschia vegnan affons enqualga buca pri serius en lur persunalitad.

Tier Jesus e cheutras era tier Diu eis ei buc aschia. Jesus, il rabbi, il magister e signur, lai vegnir ils affons tier el. EI muossa ch’in carstgaun vala tier el enzatgei, buca perquei ch’el presta enzatgei, mobein semplamein perquei ch’ei dat el.

Damai che la Baselgia lai battegiar affons pigns, attesta ella: Access tier Diu vein nus buca sin fundament da nossas prestaziuns, mobein perquei ch’ei dat nus. Dieus ei quel che sevolva viers nus. Nus essan sias creatiras. Igl emprem plaid sur da nossa veta secloma: ti eis beinvegnius! E quei avon che ver prestau enzatgei.

In affon pretenda carezia

In affon pretenda carezia. El di atgnamein a nus carschi: Sch’ei duei dar enzatgei orda mei, lu hagies bugen mei. Carezar consista buc en emprema lingia ord bials sentiments e puppergnems, mobein entras dir GIE ad enzatgi. Quei GIE vul il bien dil carstgaun, vul siu saun svilup. Perquei consista quei GIE ord educaziun. E-ducare vul dir: Menar en ina buna direcziun, gidar a sesviluppar, a daventar ina persunalitad. Il motto dall’ARGO secloma: Wir stärken Persönlichkeiten. Jeu crei buca che prestaziuns intellectualas ni sportivas gidien leutier, mobein il dir GIE a quella persuna e sia atgnadad e habilitad, gest aschia sco Dieus fa ei e sco Jesus ha mussau ei cun schar vegnir ils affons tier el. Ei vegn per in carstgaun giuven en scadin cass esser grev da crer ella carezia divina, sch’ins sto acquistar sin tiara tut entras prestaziun, forsa perfin il perdunament.

Sur Marcus Flury

An den Anfang scrollen