Überspringen zu Hauptinhalt

Veta senza aria

Igl ei buca lev da dar ina risposta positiva sin la damonda: Tgei ei quei ‚spirtus’?. Bia pli lev eis ei da descriver situaziuns nua ch’ei regia pauc ni in­summa buca spért. Per exempel: Nus tuts savein tgei ch’ina sgnocca buca spirtusa ei. Ella sa esser penibla ed ins ri silpli sfurzadamein.

Nus sentin sch’in oratur fa plaid senza spért. Ei maunca in cuntegn ed ei ina innundaziun da plaids vits. Quei ei lungu­rus. Senza spért vul dir: lungurus, mehanic, freid, eri e stinau. Senza spért munta ton sco senza veta.

Tschuncheismas ei la fiasta che regorda nus vid la vegnida dil Sogn Spert. Per descriver la muntada dil Spert da Diu per nossa veta e nies mund, gida la damonda negativa: Tgei fuss senza il Spert da Diu?

Senza Sogn Spert fuss la cardientscha cristiana mo ina ideologia religiusa e nossas oraziuns plaids vits. Senza Sogn Spert fuss la teologia empau canera entuorn enzatgei ch’ins numna Diu e la Baselgia ina institu­ziun freida ed ideologica sco in bal senza aria, pia buca da duvrar.

Igl ei interessant da saver ch’il lungatg biblic, il hebraic drova per aria e spért il medem plaid – ruach. Sco igl ei buca da vi­ver senza aria, eis ei buca da viver humanmein senza spért.

Sch’il sogn Spert ei empermess ed era daus alla Baselgia. Quei vent dil Sogn Spert emprov’ins denton adina puspei da canalisar. Igl ei sco tier in dutg. Sch’el enquera sez siu vau, sa enzatgei crescher sper sia riva. Secapescha ch’in tal dutg ei pli prigu­lus. El sa enqualga ir sur ils urs ora. Inaga ch’el ei ca­na­lisaus, tila el meglier, mo ei dat strusch veta en el ed en­tuorn el.

Lein esser aviarts pil vent frestgentont dil Sogn Spert e dar liber vau ad el per che veta cristiana prospereschi.

Sur Marcus Flury

 

An den Anfang scrollen