Sto ei adina esser in gentar da Perdanonza?

“Cu ina famiglia ha buca pli la pusseivladad da serimnar regularmein entuorn la meisa stat ei fetg mal cun ella.”

Quei scriva sur Martin ella Quotidana dils 4 d’october el Forum. Il tetel secloma: “Negina Messa”. El deplorescha che quei ei adina puspei realitad en ina ni l’autra pleiv. Gie, nus catolics essan quels da messa, forsa memia zun! Mirond sin il citat all’entschatta, sedamodel jeu, sto ei adina esser messa, pia perdanonza, cu ins semetta a meisa. Semetter da cuminonza a meisa ei impurtont. Ei ina marenda, sco ins di ella Cadi, ni in beiber café, sco ins numna ei ella Foppa, buc era impurtont ed enzatgei che nutrescha? Serimnar per retscheiver il paun dil plaid e per rispunder ell’oraziun, pia semetter sco famiglia regularmein a meisa, era “mo” per cafè ni marenda, mantegn la cuminonza. “Sche dus ni treis ein radunai en miu num, sun jeu en lur miez”, di Jesus.

Sur Marcus Flury, spiritual gidonter