Historia dalla casa pervenda a Sagogn
La casa pervenda catolica ei situada sin in crest el sid dil Vitg dadens da Sagogn. Cun sia posiziun marcanta fuorma ella, ensemen culla baselgia parochiala, in ensemble impressiunont. Tenor examinaziun dendrocronologica ei l’emprema fasa da baghegiar succedida entuorn gl’onn 1453. Circa 20 onns pli tard han ins cuntinuau cun ina secunda etappa architectonica. Ils paders premonstratensers ein stai responsabels tochen 1539 per la pastoraziun. Quei onn han ins sligiau lur claustra da sogn Glieci a Cuera. Culla Missiun retica da 1633 tochen 1649, decidida digl uestg da Cuera, han paders caputschins sespruau da gudignar anavos ils reformai per la confessiun veglia. Ina notizia digl onn 1644 informescha ch’ins ha lu engrondiu la casa pervenda. Cun interrupziuns han ils caputschins pastorau a Sagogn tochen gl’onn 1923. Entuorn 1900 han ins alzau il tetg dalla casa pervenda e curclau quel cun tievlas enstagl slondas. Ils onns 1953 e 1978 han ins fatg ulteriuras lavurs da renovaziun.
Dapi il fevrer 1983 ei la casa pervenda sut schurmetg dil cantun Grischun. 27 onns pli tard ha ei dau ina renovaziun cumplessiva digl edifeci marcant cul tetg smuttiu. El plaunterren han ins scaffiu ina sala dalla pleiv cun cuschina, lu han ins midau la veglia sala da scola en in biro per la pleiv sco era las tualettas publicas. Culla renovaziun igl onn 2010 han ins plinavon baghegiau ell’emprema alzada e surcombras duas habitaziuns, ina gronda da 5 ½ ed ina da 2 ½ stanzas.
Pieder Caduff