Fenadur: Porta-curtgin

La porta dil meins fenadur sesanfla a miez il marcau da Glion. Ella ei sempla, bassa, fa siu survetsch. Denton: ella meina en ina oasa verdegonta: egl iert-pervenda. Uss, duront la stad, passa mintga di in entir triep persunas tras la portetta. Ellas vegnan per bugnar, zerclar, ligiar si, raccoltar e s’entupar, suar ed oravontut selegrar e smarvegliar.

Schi nunpareivla sco la porta ei, ella dat access ad in paradis. Flurs en melli colurs, fretgs e verduras da tuttas fuormas e jarvas odurontas presentan la rihezia dalla scaffiziun.

Ina tala porta-curtgin ha era igl autur dallas suondontas lingias:

In curtgin ei sco in siemi dad in auter mund, sco quei ch’el savess esser:
In liug da bellezia e da pasch,
da fritgeivladad e grazia,
digl esser colligiaus cun tut quei che viva.
                                                           (autur nunenconuschent) 

Jeu sperel, per mei e per biars, ch’igl iert-pervenda resti aunc ditg. El regorda nus vid il parvis ch’ei d’anflar sin tiara.

Flurina Cavegn-Tomaschett, collaboratura pastorala