Fastitgs el meins fenadur
Binaris en ina staziun vesan ora sco fastitgs. Il tudestg drova gie la noziun “Spurbreite”. Secapescha ch’in tren lai buc anavos fastitgs. El suonda els. Mo per cletg sto il maschinunz buca sez anflar la via. El astga ver la fidonza che las untgidas seigien tschentadas endretg, aschia ch’il tren va sils dretgs fastitgs e sa ir ord la staziun ni entra ella staziun sil dretg perrun. Tuttina sa el buca schar ir il tren a moda tschocca. El sto tener en egl ils signals e forsa star eri per schar ad in auter tren la preferenza.
En nossa veta vegnan era biaras untgidas tschentadas entras carstgauns, entras situaziuns ed eveniments nunspitgai. Mo ei dat era en nossa veta signals ch’ein da risguardar e che gidan a suandar ils dretgs fastitgs. Sentupadas, discuors cun carstgauns, lectura che dat da patertgar e che muossa vinavon ed aunc bia auter sa esser in signal impurtont che meina nus vinavon. Esser allerta per quels signals ei impurtont.
Sur Marcus Flury, spiritual gidonter
Foto: Arne Hückelheim – Eigenes Werk (Wikipedia)