Avrel: la porta dil santeri

La fiasta da Pastgas ei vargada. A moda festiva havein nus commemorau la levada da Jesus Cristus. Ei dat differents maletgs e simbols per declarar quei ch’ei atgnamein strusch da declarar. In maletg ei la porta che Jesus ha aviert entras sia mort e levada. Ina porta che meina dil mund terrester el mund celestial.

Pil meins avrel hai jeu ord quei motiv fotografau la porta d’entrada al santeri s. Giusep a Glion. Sco cristianas e cristians cartein nus che la porta alla veta tier e cun Diu sesarva era in di per nus. Jeu giavischel a nus tuttas e tuts, che quei patratg enriheschi gia la veta cheu sin tiara.

Flurina Cavegn-Tomaschett, collaboratura pastorala

Oraziun “alla porta”

Carstgaun, ti eis semess sin via. Nua vas?
La senda viers tia finamira maunca sin la carta da viagiar.
Tiu viadi dalla veta meina tei uss alla davosa porta.
Pli datier che ti vegnas a quella finamira,
e pli levs che tes pass daventan.
Ti sentas, co ti vegnas clamaus.
Sefai libers da tut quei che impedescha tei
da serender vies la porta.
Glisch sclarescha tia via, ella carmala tei.
Ti stas avon ina gronda porta aviarta.
Ina glisch caulda fa beinvegni.
Igl access ei libers.
Tgei spetga tei?
Aschia sco la maula daventa ina grondiusa tschitta, aschia semidas ti enten trapassar la porta.
Ti possedas ussa nuot auter che l’encarschadetgna e la carezia per Diu.
Va ruasseivlamein sur il pass!
Hagies curascha e fidonza!
Ins spetga tei.
Ti astgas star, cheu ei plaz per tei.
Dieus ha scret tiu num en sia palma maun.
Ti eis a casa.
Stenda ora tes mauns.
Mira – leu vegn EL encunter a ti.