Biars duns – in Spert!

Sco giuven spiritual erel jeu caplon en ina gronda pleiv. Nus eran treis spirituals e dus laics da differenta vegliadetgna che vevan da collaborar. Tier las sesidas da team dev’ei per la pastoraziun differentas ideas, differents pugns da vesta e differents accents. Suenter las discussiuns reparteva il plevon las incaricas e sch’in veva l’impressiun che quella incarica corrispundi buca propi allas atgnas habilitads, scheva el adina: “Fai quei aschia sco ti sas far ei.”

Inaga pli tard hai jeu dumandau el, co el sesentevi en nies team. Sia risposta ei stada: „Per mei eis ei buc adina stau aschi lev. Jeu sentevel la differenza da vegliadetgna denter vus e mei, mo ei era bien che vus vevas differentas ideas e differents duns. Cheutras ei schabegiau bia positiv.“

Gia ella pleiv da Corint dev’ei considerablas tensiuns. Entgins carstgauns vevan specialas habilitads da ludar Diu cun tuns e melodias ch’ils auters mo smarvegliavan. Els valevan per carstgauns ch’eran tschaffai dil Spert. Ils auters sedumandavan: Operescha il Spert mo en els? Quei divideva la pleiv ed a quella damonda ha s. Paul stuiu rispunder.

Ell’ emprema brev als da Corint di el: „Ei dat differents duns spirituals, il Spert ei denton il medem. Ei dat differents survetschs, denton mo in sulet Signur. “ (1. Cor 12,4ss) Biars duns – in Spert! Mintgin e mintgina ha sias habilitads – mo era ses cunfins. Tut duei denton survir pil beinstar general.

Era en nossas pleivs schabegia bia entras carstgauns che han buc in’ incarica speciala. Cons carstgauns cun in dun pratic segidan cun auters senza gronds plaids! Nus vein carstgauns cun il dun da saver cussegliar ni consolar. Con dil bien fan els! Nus vein carstgauns cun ferma e perschuadenta cardientscha mo era carstgauns ch’enqueran e dubetan. Era lur plaid sa esser impurtonts, perquei ch’el lai sentir enzatgi ch’ei dat aunc auters ch’enqueran. Cun s. Paul astgein era nus dir: „Quei tut operescha il sulet e medem Spert che reparta ses duns a scadin sco el vul.“ (1 Cor 12,11)

Impurtont ei che nus duvreien ils duns dil Spert pil beinstar general. Lu realisein nus ed essan nus Baselgia.

sur Marcus Flury, spiritual