Cun miu Diu sursegliel jeu mirs

Ils psalms fuorman in dils 73 cudischs dalla Sontga Scartira. Ils 150 psalms audan denter las parts las pli enconuschentas en la Bibla. Lur cuntegn ei en emprema lingia in laud a Diu. Els psalms anflein nus era reflexiuns sur dalla veta dil carstgaun e ses plaschers e sias grevezias. La cardientscha en Diu e sia buontad ei adina puspei tegn e speronza en tuttas situaziuns dalla veta.

Dunnas ed umens en claustras ed era ils spirituals uran di per di psalms. Per esser sincers, buc adina schabegia quei a moda cunscienta. Sco tut san era quellas oraziuns daventar disa. Quei ei normal. In di hai jeu urau il psalm 18.Tiel vers 30 sun jeu staus eri. Duas ni treis gadas hai jeu legiu ils plaids: “Pilver, cun tei attachel jeu barricadas, cun miu Diu sursegliel jeu mirs.” Quels plaids han anflau ina resonanza en mei, han tuc mei. Daco? Jeu sesanflavel lu en ina situaziun psihica da malguessadad e tema. Quei plaid ha dau curascha. Gie, cun miu Diu damognel jeu quella situaziun.

Nus fruntein adina puspei encunter mirs e barricadas. Malsognas, carstgauns, circumstanzas, bloccadas internas san esser da tals mirs. Quei vers dil psalm radiescha ina ferma fidonza egl agid divin e gida ad ir vinavon la via.

S. Augustin dat a nus ina buna regla per urar psalms. El di: “Sch’il psalm ura, lu urei, sch’el schema, schemei, sch’el engrazia, engraziei, sch’el spera, sperei, sch’el tema, temei. Pertgei quei che stat scret els psalms, ei sco nies spieghel.” Els plaids dils psalm ston ins buca mo veser l’atgna veta. Ins sa era s’identificar cun carstgauns en ina dallas situaziuns descrettas el psalm.

Sur Marcus Flury, mitarbeitender Priester