Dus buns tips

Anselm, aschia senumna il scribent, vegneva mudergiaus dapi liung temps dad ina bronchitis. In enconuschent ha mess a cor ad el dad ir tier in miedi che pratichescha l’acupunctura. Quei ha Anselm lu era fatg, malgrad ch’el haveva buca grondas spetgas da quella moda da medischina alternativa.

Suenter ch’il miedi ha giu mess enqual guila ha el aunc dau dus tips ad Anselm ; dus tips che s’audan naven da gliez di tier il program d’ina veta ventireivla digl anteriur pader : Il miedi ha vuliu saver, sch’el seigi en discordia cun ina persuna ord siu stretg ravugl dalla cuminonza claustrala. Cun sentiments empau penibels ha Anselm confirmau la damonda. « Veis Vus gia inaga fatg oraziun per quei carstgaun ? » ha il miedi aunc vuliu saver. Suenter cuorta ponderaziun ha il pader rispundiu cun in na. « Lu fagei quei, urei per el, gie benedi sapientivamein vies confrar. Cheutras vegn Vossa tenuta enviers quei carstgaun a semidar e Vus vegnis a saver ir entuorn meglier cun el. » E lu ha il miedi aunc dau in secund tip : « Seigies mai permalaus ! Pertgei cun lezza tenuta fageis Vus mo donn a Vies beinsesentir. »

Sco ei para ein quels dus tips daventai in bien agid per Anselm. Mei perschuadan els era. E dil reminent ha in auter «miedi» gia detg avon 2000 onns: «Carezei vos inimitgs, fagei dil bien a quels che odienschan vus, benedi quels che smaledeschan vus, urei per quels che offendan vus.» (Lc 6,27-28)

Tgi che less bugen in tip da lectura per leger igl entir cudisch, schibein quel dil miedi chines sco era quel dil miedi d’avon 2000 onns, sa bugen s’annunziar tier mei.

Flurina Cavegn-Tomaschett, assistenta pastorala