Fastitgs el meins da matg

Fastitgs da Diu el mund ein pil pli pigns e nunspectaculars. Ins anfla els buc exnum leu, nua che tut ei grond e clar, mobein plitost el pign, el zuppau ed aschia era lev da surveser.

Biars enqueran forsa il divin en zatgei extraordinari. Mo gest tuttina sa il divin semuossar el pign: En in mument pascheivel, en ina sentupada che fa bein, ni ella forza da buca resignar en muments pesonts e grevs. Talas experienzas selain savens buca tschaffar en plaids, mo ellas han in effect pil pertuccau.

Era ella natira vegn ei savens tschintschau dils fastitgs da Diu – el crescher e vargar, ella bellezia, mo era ella vulnarabladad humana.

Medem impurtonts ein era ils fastitgs el viver in cun l’auter: Leu, nua che carstgauns han quitau in da l’auter, gidan, consoleschen e perdunan. En tals muments ves’ins buc ils fastitgs da Diu culs egls, mo ils pertuccai percorschan, enzatgei survarga cheu igl esser human.

Fastitgs da Diu el mund ein buca in mussament final dalla preschientscha divina el mund, mobien plitost in invit pil far stem, dil far enqual patratg. Ei regorda nus, da viver el present e da buc surveser il pign, fleivel e zuppau.

Armin Cavelti, gidonter pastoral