La pleiv da Sevgein ei mintg’onn l’emprema che festivescha perdanonza. Che quella ei gest duront il temps da cureisma ei ina particularitad. Dumengia vargada han ils da Sevgein celebrau quella fiasta ecclesiastica dedicada alla Sontga Fossa.

Augustin Beeli/FMR

La fiasta principala dalla pleiv da Sevgein ei mintg’onn la davosa dumengia dalla cureisma ed ei dedicada alla mumma dallas dolurs e la s. Fossa. Quella dumengia va la processiun dalla baselgia parochiala tochen sil crest sur il vitg. Da 1683 tochen viaden il 20avel tschentaner visitavan mintg’onn tochen 5000 pelegrins quei liug cun sia caplutta. Dalla vart seniastra digl altar principal fageva la nischa culla scena dalla sontga Fossa impressiun ed ils pelegrins encurevan cunfiert leu.

Envidau ils vischinsIl vut, la statua da Nossadunna dallas dolurs cul fegl crucifigau, portan ils da Sevgein mintg’onn treis gis avon perdanonza ella baselgia parochiala. Aschia ha la «pietà» beneventau dumengia parochianas, parochians e hosps d’autro. Alla perdanonza d’uonn ha la pleiv envidau era ils vischins da Glion, Schluein e Sagogn. All’entschatta dil survetsch divin festiv ha sur Alfred Cavelti , il plevon dallas quater pleivs, salidau numerus hosps. Il Chor mischedau da Sevgein ha cantau sut la bitgetta da Flavia Walder, denter auter ina canzun nova da Gion Balzer Casanova ed in «Dona nobis pacem» da Mary Lynn Lighfoot . L’organista Rahel Hohl ha accumpignau il chor.

Ella tradiziun populara ei la perdanonza da Sevgein enconuschenta sco «perdanonza da schnecs». Il motiv ei evidents, pertgei duront la cureisma dueva il pievel cartent desister da magliar carn. Per metter tuttina zatgei special sin meisa, survevan ils da Sevgein a lur hosps mintg’onn ils schnecs. Il convischin Giusep Demont (1884 – 1975) ha descret extendidamein quei usit popular en in text ch’ei deponius egl Archiv da stadi dil Grischun.

Suenter il survetsch divin ha la raspada accumpignau il vut, cun cant dil chor, anavos sil crest ella caplutta da s. Fossa. Suenter ina cuorta devoziun ei la processiun returnada el vitg e sin Piaz, il plaz-cadruvi, ei la part ecclesiastica ida a fin. Lu han la pleiv e las uniuns envidau tuts al past festiv. Cura ch’ei dat en autras pleivs il barsau gustus da perdanonza, s’imaginesch’ins a Sevgein ils schnecs – la spisa tipica da carn da saun freid. Quei ha ei buca dau, mobein in gustus fortem cun pulenta e legums.