In citat sco muossavia!

Quei verset sil calender avon miu biro prendel jeu cun mei ellas vacanzas che jeu astgel passentar las proximas duas jamnas. Buc che jeu laschel mi’ura a casa. Na, senz’ura sundel jeu magari sepiars ed jeu drovel segir era el temps liber mintgaton in’orientaziun partenent il temps.

Tuttina, jeu prendel a cor quei impuls e vi ver temps per mei, per sentupadas, per leger, per emprender d’enconuscher zatgei niev e bi. El mintgadi, era d’in plevon, dat ei detgavunda termins ch’ein da risguardar. E cheu ei in’egliada sill’ura dengrau per buca munchentar zatgei. Duront las vacanzas ei e duess ei esser auter. Cheu astgel jeu parter en miu temps sco jeu vi e guder la libertad da far quei che fa plascher.

Il plaid “vacanzas” exprima quei. Vacant munta esser vids ni detg auter: sefar libers per acquistar novas experientschas e retscheiver novas forzas. E quei ei mo lu il cass sche jeu prendel bia temps e peda per memez e miu beinstar.

Sche Vus veis sco jeu proximamein vacanzas, gudi bia temps per Vus, senza sforzs, senza termins, senza mirar trasora sill’ura. Lu fageis Vus veramein vacanzas!

Sur Alfred Cavelti