In citat sco muossavia
La litania tier il ss. Cor da Jesus (Alleluja nr. 717) finescha cun quella fetg biala e significativa supplica.
Il meins da zercladur ei dedicaus al ss. Cor da Jesus. Venderdis ei stada la fiasta dil Cor da Jesus. Jeu numnass quella fiasta bugen la fiasta dalla cordialitad divina ch’ei semussada en Jesus Cristus. Gest il plaid ‚Cor da Jesus‘ ei sco ina clav che vul e sa arver a nus il misteri divin. Igl ei ina clav che flada il spért biblic.
Il special e nuncumparegliabel che Dieus ha palesau a nus entras Jesus Cristus ei, che Dieus ha in cor, in cor human per schar sentir nus sin moda humana sia gronda carezia. Sco carstgaun ha el sentiu cun siu cor sco nus. Perquei ha el saviu sentir nossa legria e nossa dolur, nos giavischs e nossas trumpadas, nossa bandunadad e fleivlezia. Tgi che legia atras ils evangelis, vesa incontin co Jesus ha in cor pils carstgauns en puccau, en malsogna, en tristezia ni situaziuns desperadas.
La fiasta dil cor da Jesus intimescha nus da purtar viaden en nies mund dapli cor ed aschia era schar sentir il mund che Dieus careza nus. Aschia daventa il cor da Jesus ina clav che arva nus ed auters carstgauns pil misteri da Diu. Dieus ha in cor per nus. Lein era nus ver cor per Diu!
Sur Marcus Flury, spiritual gidonter