Historia dalla pleiv da Sevgein

La pleiv catolica Sevgein/Castrisch/Riein cumpeglia ils rodund tschientrenta habitonts catolics dil vischinadi Sevgein sco era ils rodund tschientschunconta habitonts catolics dallas fracziuns vischinontas Castrisch e Riein.

La baselgia parochiala s.Tumasch ei pustada sin in crest marcant bein veseivla da lunsch entuorn. Sin fundament dallas excavaziuns igl onn 1969 eis ei enconuschent che Sevgein e siu contuorn era habitaus gia dapi 3000 onns e ch’ei ha dau gia dapi varga 1000 onns baghetgs sacrals sil crest-baselgia.

Ecclesiasticamein ha Sevgein fatg part entochen la reformaziun 1530/1537 dalla pleiv da Castrisch, ferton ch’ils libers purs da Sevgein appartenevan politicamein als conts da Laax. Igl onn 1517 ein els sedistaccai dils conts da Laax. Silsuenter ei vegniu fundau a Laax in’atgna dertgira che ha cuzzau entochen igl onn 1850. Suenter la reformaziun ein ils da Sevgein era sesparti ecclesiasticamein da Castrisch, cunquei ch’ils da Castrisch eran sedecidi per la reformaziun. La pluralitad dils da Sevgein ei stada fideivla alla cardientscha catolica. Igl onn 1647 ei in’atgna pleiv seformada ch’ei vegnida menada e pastorada (cun in’interrupziun ils onns 1823-1844) da paders caputschins entochen igl onn 1929. Dalunaven vegn la pleiv pastorada da spirituals.