Siemis san crescher

Per l’entschatta dalla scola hai jeu elegiu il tema siemis e giavischs. Tals havein nus tuts crei jeu avunda… jeu sperel silmeins. Mo co stat ei lu cun quels siemis, giavischs? Daventan ei era realitad? Leutier ina, tenor miu meini, fetg buna historia:

En in siemi stat ina mattatscha avon ina stizun. Plein marveglias legia ella l’inscripziun sin la tabla sur igl esch: “Stiziun dils giavischs. Tgei duei quei pomai esser per ina stizun?” La mattatscha entra en stizun e davos la meisa dalla stizun stat in aunghel. La mattatscha damonda: “Tgei vendis vus lu cheu?” Igl aunghel rispunda curteseivlamein: “Tut quei che ti giavischas.” La mattatscha damonda vinavon: “Veramein tut quei ch’jeu giavischel – veramen tut?” Igl aunghel serepetta: “Gie, tut quei che ti giavischas.”

La mattatscha leva gia plein euforia entscheiver a dumbrar si ses giavischs, mo cheu seretegn ella dabot e di si per sesezza: “Sch’ins sa veramein cumprar cheu tut ils giavischs, lu ein quels segiramein fetg cars… lu sai jeu buc selubir schi biars giavischs! Igl emprem stuess jeu ponderar, tgei giavischs ch’jeu hai veramein!” La mattatscha sesa giu e ponderescha.

Suenter in mument ei la mattatscha puspei turnada anavos alla meisa ed ha clamau: “Jeu sai ussa, tgei ch’jeu giavischel!” Igl aunghel surri e damonda anavos: “Tgei astg’ei lu esser?”

La mattatscha rispunda: “Jeu giavischel bunas notas, in bien onn da scola cun bia success, ch’jeu hai puspei pasch cun mias amitgas, pasch per tuts carstgauns, avunda da magliar per tuts carstgauns…”

Cheu interrumpa igl aunghel ella curteseivlamein e di: “Perduna, ti has capiu mei falliu: Nus vendin negins fretgs, nus vendin mo il sem!”

Buca fretgs, mo ils sems. E nus savein, per ch’ei detti orda sems in di in fretg, drov’ei bia engaschi e lavur. Pia schai ei vid nus, da tgirar ed haver quitau da nos siemis e giavischs, ei drova nossa stenta e forza, nies engaschi, per che quels, silmeins enqualins, san daventar realitad.

Armin Cavelti, catechet e gidonter pastoral