Tiu reginavel vegni…

Cun l’emprema classa sun jeu vid emprender il Babnos. Nus fagein quei pass per pass, e tematisein secapescha era mintgamai tgei las singulas expressiuns da quell’oraziun vulan dir. Ella davos’ura havein nus urau: “Tiu reginavel vegni tier nus”.

Pils affons ei quei buc adina schi sempel da capir. Sin la damonda, co il mund vesess ora, sch’il reginavel da Diu vegnessi, ein els savens surdumandai… Bugen prendel jeu lu in beinenconuschent text ord il Veder Tesament, numnadamein Jesaia 11 en agid, nua ch’ei ha num:

Il luf seplacca spel tschut,
e sper igl ansiel cauma il panter;
vadi e liun pasculeschan ensemen…
vacca ed uors fan amicezia…
il liun maglia strom sco ils stiarls…
Il pop fa termagls spel lagugn dalla siarp,
il buob stenda siu maun viers il cuvi dalla vipra.
Ins fa buc entiert ni dil mal
sil cuolm da mia sontgezia…

Gie –  in bi maletg pil reginavel da Diu. E cu ils affons han lu udiu quei text, ein els plein ideas, co ei savess veser ora, sch’il reginavel da Diu fuss gia cheu.

Mo mirond sin nies mund stuein nus constatar, che nus essan aunc lunsch naven da quei. Ed ils davos dis ei quei maletg vegnius destruius aunc bia pli fetg. Ei regia terrur ed uiara, e quei buc lunsch naven da nus. Cun sgarschur mirein nus enviers l’Ucraina ed essan schoccai da quei che schabegia, da quei che carstgauns san far dil mal in a l’auter.

E tgei savien nus far? Pauc ni nuot?

Ils maletgs e las reportaschas ord biars marcaus dall’entir’Europa muossan enzatgei auter. La solitaritad cun l’Ucraina ei nundetg gronda. Cheu vegn organisau agid da tonts carstgauns, cheu vegn cantau ed urau, demonstrau per pasch e giustia… Jesaja lai salidar!

A mi fa quei grond’impressiun, tgei unda da solidaritad che va tras l’Europa. Ed jeu sun segirs, che tut quei schabegia era e gest cun igl agid da Diu, il Spert sogn che metta en moviment biars buns carstgauns, naven dall’America tochen ella Nova Zelanda.

Gie, era tier nus ein carstgauns en moviment, organiseschan acziuns d’agid, serimnan per urar, envidar candeilas e cantar… sco mesjamna vargada a Glion… e quei buca paucs. A mi fa quei grond’impressiun e dat curascha, ch’il schiet e mal vegn buc ad haver il davos plaid. E forsa serealisescha in di veramein il plaid che di: Ins fa buc entiert ni dil mal (in a l’auter) sil cuolm da mia sontgezia…

Armin Cavelti, catechet e gidonter pastoral