Uiara ed aua

Las davosas jamnas ha ei dau oravontut duas tematicas ch’ein vegnidas ventiladas en discuors tier sentupadas sin via: L’uiara ell’Ucraina che astga buca vegnir numnada aschia e la bellezia aura el meins da mars. Tier l’uiara tuts che scrolan il tgau e san buca capir ch’ins sa ord motivs da pussonza e vanagloria attaccar ina naziun, mazzar carstgauns e destruir entirs marcaus, aschia che mellis ston schar anavos tut e fugir.

Mo ussa tier la bialaura. Nus gudin ella. Ins auda en discuors denton era il quitau per l’aua. Senza aua negina veta. Quei ei era ina tematica ell’enciclica da Papa Francestg cul num “Laudato si”. Aua ei enzatgei zun impurtont. Privar il carstgaun dall’aua munta privar el dalla veta. Secapescha che la munconza d’aua ei in resultad dalla midada dil clima che nies stil da viver caschuna. Pitir piteschan da quei oravontut ils carstgauns en tiaras paupras. Damai che la munconza da bun’aua vegn adina pli gronda, han entgins concerns ferdau la puorla. Els vulan privatisar aua per saver vender ella. Cheu di il Papa: “Igl access tier aua ei in dretg human fundamental e general, perquei ch’el ei decisivs per surviver.”

Jeu temel che la controlla sur dall’aua entras gronds concerns globals savess daventar ina nova fueina da conflicts en nies tschentaner.

En la canzun “Laudato si” da s. Francestg vegnan tuts elements numnai frars e soras. Era concarstgauns – emporta buca da tgei colur e derivonza – ein frars e soras. Jeu crei che quella vesta e tenuta savess far orda nies mund ina dimora habitabla, nossa casa communabla.

Sur Marcus Flury, spiritual